باتىر انانىڭ ارمانى ورىندالدى

تۇركىستان قالاسىنداعى ياسسى اۋىلدىق وكرۋگىنە قاراستى ەڭبەكشى ديقان اۋىلىنىڭ تۇرعىنى, كوپ بالالى انا ازات مۇستافاەۆا ەڭبەك دەسە وزگە دۇنيەنى ۇمىتاتىن شارۋاقور كىسى. وڭتۇستىكتە ماقتا دەگەن داقىل وسەدى. وت شاشقان كۇن توبەڭنەن ءتونىپ, جەردىڭ بەتىندەگى قىبىرلاعان جانداردى تاباعا سالىپ قۋىرىپ جاتقاندا اتىزدا شابىق شاۋىپ, ەڭكەيىپ ماقتا تەرۋ قيىننىڭ قيىنى. كوپ بالالى باتىر انا تۇرمىس تاۋقىمەتىن جەڭىلدەتۋ ءۇشىن ەڭبەك مايدانىندا جانىن اياماعان. تۇركىستان قالاسى بويىنشا ماقتا تەرۋدەن ەكى رەت الدىنا جان سالماعان تەرىمشى انا قالا اكى­مى الىپبەك وسەرباەۆقا استانا قا­لاسىنا بارىپ, قىدىرعىسى كەلە­تىنىن ايتقان ەكەن. جۋىردا الىپبەك وسەرباەۆ باتىر انانى ارنايى قابىلداپ, استاناعا ءبىر اپتا قىدىرىپ با­رۋدىڭ شىعىنىن كوتەرەتىندىگىن حابارلادى. «مەن ون بالا ومىرگە اكەلگەن انامىن. جاس كەزىمدە سولاردى ءوسى­رىپ, جەتىلدىرەمىز دەپ سىرت جاققا قىدىرۋ ويعا كەلمەدى. استانا ءايبات قالا دەپ ەستىگەننەن كەيىن ءبىر كورگىم كەلىپ ءجۇر ەدى. قارجى جەتىسپەگەننەن كەيىن امال جوق قالا اكىمىنە ايتتىم. الىپبەك باۋىرىما راحمەت, سوزىندە تۇردى. ەندى مىنە, بارىپ قايتۋ بيلەتى, كەرەكتى قاراجات قولىمدا تۇر. قاسىمدا ەكىنشى ۇلىم ايدار بار». ەڭبەك ارداگەرى راحمەتىن جاۋدىر­عان قالا اكىمى: «حالقىمىزدا «جاس كەزىمدە بەينەت بەر, قارتايعاندا زەينەت بەر» دەگەن قاناتتى ءسوز بار. بۇل كىسىلەر ەلىمىزدىڭ بايلىعىن ەسەلەۋدە قىرۋار ەڭبەك ەتتى. كومەك سۇراۋى زاڭدى. ەڭبەك وزاتتارى قۇرمەت كورۋى ءتيىس. ولارعا مەيلىنشە جاعداي جاساۋ جاستارىمىزعا ۇلكەن تاربيە وشاعى», دەيدى. وسىلايشا, جاس كەزىنەن بەلى بۇگىلىپ ماقتا القابىندا جۇرگەن ەڭبەك وزاتى قالا اكىمىنىڭ قولداۋى­مەن استاناعا جول تارتپاق. باقتيار تايجان, «ەگەمەن قازاقستان» وڭتۇستىك قازاقستان وبلىسى